這是我在某群組說過的狀態。有緣者可參考。需要入群才能看,但我也在這裡轉貼一次。
這篇我是用廣東話說的,如看不懂可問我,我盡量講解。
https://www.facebook.com/groups/178336517425476/posts/824976726094782/ [img]
https://scontent.fhkg10-1.fna.fbcdn.net/...GXg&oe=65BE979F[/img]
[img]
https://scontent.fhkg10-1.fna.fbcdn.net/...CNQ&oe=65BE4A21[/img]
[img]
https://scontent.fhkg10-1.fna.fbcdn.net/...r5Q&oe=65BE749C[/img]
我遇到奇怪、靈體、宗教既事。係其他群組講過下,未有人好肯定答到咩事。試下係到講。
要詳細講會好長,我盡量簡單講,有咩問題可以再問返,我會盡量答。
我會講我遇到既奇怪現象,而暫時唔會講連帶既其他事件(因為講會太長),總之先專注係奇怪、靈體、宗教層面。
當然,關心成個脈絡或想幫助既人士,可以留言傾計,我亦都會盡量答。
————
我宜家住西貢將軍澳區,1992年英治香港出世,有BNO。
我住緊健明邨,歡迎街坊報料,係咪其他樓都係咁,我住緊明域樓。
一、2018年西元5月,有日下午係屋企,聽到樓上室內近大門口位有巨響,總之係將不知明物體撻落地下既聲,非常重、非常沉實。當時感覺係至少一個大人既體積,重重咁被撻落地下。當時我有研究宗教,以為係宗教事,但亦都叫左大樓保安去處理,話樓上有噪音。
從呢一次開始,我就2018年年中開始,24小時都聽到樓上有噪音,但無第一次咁大聲,減左10倍,但都好大聲,我2023年終於巧合錄到個噪音,可以去我YOUTUBE睇+聽,有絕少部分人話見到高級靈體。
二、2018年西元7-8月,我細佬(佢當年14歲),佢夜晚12點話出街,我問佢去邊佢無講,我話如果去食野就餐廳關哂,佢都係無答我。咁佢未夠18歲,唔應該比佢咁夜自己出街。
跟住,無啦啦唔知咩事,擾攘左一陣,我細佬無啦啦開始打我個頭,我又唔知咩事無啦啦企定左係大門口位比佢打。當時係開左大木門,但關左鐵闡。我同細佬感情一直好好,但2018開始就有變,我細佬變左,我問佢野佢唔會答我,以前係問佢野佢會答我,感覺係有邪術影響(宜家2023年好返少少,但都係少答人)。因為我同細佬感情好好(加上我2018年之前已經感應到我同佢前世係咩身份既人),我無諗過還手打返佢,但唔知點解亦無抵擋佢打我個頭。佢打左我個頭差唔多10分鐘,中大力,係痛既,但好彩我個頭夠硬,亦好彩我無死。
我細佬打完我頭10分鐘後,我聽到鐵闡出面有拍手掌聲,感覺似係慶祝聲,亦感覺係一個女細路靈體拍手,可能亦有幾個靈體係到,但總之係見唔到,只係聽到聲。後尾研究返,我懷疑有人落左我定身術,或有靈體上身影響左我細佬打我,又再上身影響埋我企定比我細佬打。
三、2018年,呢一年,我都係走廊見過奇怪野。例如:一對走動既波鞋,咩都無,見唔到人,只係對波鞋跑向我單位,又退步退返出去,只係見到對鞋走動。
四、係自已果層等升降機,聽過有九陰白骨爪既聲,類似係整指甲既聲,個感覺係個靈體故意整比我聽,佢企我好近,幾米之內,但見唔到佢,只感覺到,同聽到聲。
五、2018年果排,都會出現一張通渠卡片,有時會放係我果層等升降機大堂個牌,有時會係樓下商場D升降機牌見到,仲有其他位,總之係同一條邨會見到。好似係有電話號碼,我無打過,我好似有影相,定係無,我搵日搵下先。
六、隔離單位,我試過出街或返屋企,總之經過隔離單位,會咁啱同時隔離單位室內發出撞大門聲,個感覺/直覺似係室內個靈體或異種人撞另一個靈體或異種人埋大門,反手鎖住個靈體或異種人,個聲好重下。呢個我聽過好多次,5-10次以上。仲有,呢個單位亦多次好快地擺一對鞋出門口,然後好快關返門,鎖門勁大聲,係故意鎖到咁大聲,而且擰個門鎖好多次先會停。
七、又係隔離2個單位(唔係頭先果個),其中一個,我見過幾次個呀姨,但行埋去望到佢塊面係有波浪感,即係望落似外表係假扮。身型亦比較瘦少少,亦後生少少,雖然差唔多。我同佢打招呼,佢係唔應我。後呢幾年,見返個呀姨,似係換返之前果個比較正常既真身。同埋佢屋企人係有帶佛珠,屋企門口貼好多揮春、福字。
八、仲有1個隔離單位,係我門口對面單位。兩母女信基督教,同佢地算熟,多數見到會打招呼。仲有個叔叔,但唔太熟,唔知有冇信教,但都會打招呼。但唔好彩,其實仲有個哥哥,2013年中燒炭走左。(但感覺呢個哥哥走左之後,無整過D唔好既野。雖然我唔肯定,只係感覺)。又係2018年,我係屋企開左大門,關左鐵闡,下午5-6點,放工時間,我係廳沙發坐緊,望出去見到叔叔返屋企,佢之後關左門,應該有關埋鐵闡。然後,奇怪事就出現,我係無聽到任何開門聲、開鐵闡聲之下,5分鐘之內,見到另一個一模一樣既叔叔,衣著身型髮型都一模一樣,佢開左鐵闡,開左大木門入左對面單位。呢個我都有懷疑係咪個叔叔出返黎,只係無整到門聲鐵闡聲,所以我以為係另一個叔叔。呢單我真係一半半。但總之又係歸類扮人、換人事件,靈體扮人、換人,個氣味係唔同,氣味好怪,但其他野9成似。
九、仲有,有次係我屋企,我係廳發現到床單碎,之後幾日發現我呀媽張床單爛左好大個圈,兩呎X兩呎大圓圈,但邊位係破碎,唔似剪爛。應該又係靈體、不知明東西整爛。但我同我呀媽講,佢竟然話舊左爛係咁,唔當一回事,所以我覺我呀媽都係有D問題出現。
我呀媽有一期會夜晚去樓下行路,透下氣。當佢走出走廊,我聽到佢腳步聲回音到左等升降機位咁遠,我隔離單位(撞門反鎖擺鞋果個單位)就會有堆靈體或不知明界別(係人聲)會跟埋我呀媽出去,幾次係咁。2021年之後無左。
又係屋企,出現兩次整爛野,1次唔知邊個整,係個膠水壺個水口位一半咁崩左,1次係個膠杯由杯口到杯底咁裂左1條線,我呀媽話係佢整爛。我唔信係我原來個呀媽咁整,因為幾難跌到咁。綜合幾次奇怪經歷,我質問左我呀媽,問我呀媽入面個靈體咩事。我想睇下係咪真係有野上左我呀媽身,但佢又無表示係靈體上身,但佢D反應有D怪,我唔係師傅級,做唔到咩野。唔講果句都講埋,因為我呀媽一直都係有D胸,睇得出。但有一期OR到宜家都可能係,佢個胸係平左好多。呢點一半半,可能我呀媽減左肥,又或者我真係記錯佢身材。
十、係屋企,多左次數見到頭髮,有時係D好唔合理既位都會有,除非咁巧合飛埋去痴係牆,否則係唔會痴係果個位。
我問我呀媽係咪佢整,佢有時話係佢,但我問佢點會整到呢D位,而且痴到好實下,唔係飄飄下,佢答唔到我。
十一、2019年左右,有一次,係樓下商場見到我細佬,佢同同學一齊行,2-3個人。我見住我細佬入商場廁所。我入廁所搵佢,但竟然搵唔到。呢個又係一半半,我係無逐格廁所睇哂,因為有1格鎖左有人,但我烏低身望,記憶中唔係我細佬。我亦大聲問我細佬係唔係到,無反應。之後出返廁所,仲見到佢同學係到,我就問佢頭先入去你個同學係邊。佢唔知答D咩,定好似無答到。
十二、又係2018-2019年果排,我係自己果層等升降機,諗住落樓下買唐記飯食,點知等等下升降機,我聽到垃圾房果條走廊其中一個單位,有把人聲大叫「唔好去...呀...」,之後就再傳出大力關大木門聲。個感覺係關門個靈體或不知明人士,放個人出黎叫,個人叫得好淒厲,係男人聲黎,30-40歲聲,之後就大力關門。
十三、2018年,有時係屋企,呀媽都係到。開左大木門,關左鐵闡。突然我聽到有勁大聲撕吼聲係鐵闡出面傳入黎,係向住我地單位叫,但又係見唔到樣,只有聲,似係女人靈體/怪物。總之我呀媽唔當一回事,問佢唔答,好似身有屎咁。我好記得呢下聲。最驚嚇係呢次,你叫我扮比你聽都得,但我扮都會驚一驚,可想而知幾咁驚嚇。
十四、講返樓上單噪音,我前排行過哂成棟樓40層,原來唔單止我層樓係咁,係成棟樓都有噪音通告。再加,大部分樓層既單位號碼牌都被不知明東西破壞,但管理處、保安,只係用好求其既啡色膠水痴返個單位號碼牌就算,好樣衰,到宜家都係咁。似係發生左大野,但唔知點算,是但補咁樣。
有少部分樓層係無事。有少部分樓層,其中一邊牆身係裂左成條手臂咁長。仲有,咁巧合,我樓上噪音果層,防煙門玻璃係爆左,只係封左紙皮叫危險,我估好耐都無整。
十五、仲有D經歷、感覺。例如2019年,,試過係街感覺到一堆靈體(調景嶺地鐵站出面條馬路, 夜晚11點之後),攻擊另一堆坐係到既靈體。但總之係睇唔到,但你會感覺到一堆透明有質感既野走動,似D GAME隱左身既透明感覺。係2019年成街爛哂果期,我出街睇咩事而感覺到。
當時我都遇到唔少奇怪人,例如遇到個比較老既呀叔,差唔多呀伯年紀既呀叔,係調景嶺地鐵站出面,拎住條鎖匙,佢無啦啦同我講,果邊有人訓教,我望過去,係一對情侶係到傾計休息,總之呢個呀叔好奇怪。
十六、又遇過有兩個人隻手包哂繃帶,係唐明苑連接彩明苑個位,急步衝向我同我呀媽,又好快退返去。唔知係人定係靈體。時間係日頭黎。
十七、仲有,又係2018年果期去街市(我開埋名,係富康花園果檔灝境果潮),個檔販貼左張圖,話係人偷野,但我睇張圖,係CCTV,影到個類似女靈體既圖,全身白色,浮下浮下,係恐怖感覺既。我第一下感覺係聯想到九陰白骨爪個女靈體。我第一次遇到咁,當時無問個檔販,我遲D可能問下佢記唔記得當年咁樣、咩事。
大致上係咁,仲有D較小型既感覺,唔講埋出黎,有需要先講。
我已經只係講左我遇到既奇怪現象,無講哂全部事件出黎,遇到有緣人、師傅、熱心人士,我先再對應講,如果唔係講N個字都講唔哂。因為呢D事好可能關涉到宗教、政治、政府、街坊、江湖、法庭、西醫等等。
我樓上單噪音,我已經報過幾次警,完全幫唔到。當然我無同警察講我見到靈異野,只係報噪音,費事有部分警察當我痴線,當然我知部分警察有宗教信仰、亦都信有呢類野。我知警察部門入面有團契。仲有冇裝香拜神就唔知,應該有。至少我知法庭地方有。諗返起,我係有同一個CID講過我呀媽有類似問題,不過個CID無當我痴線。
我2022年遇到同座18樓街坊,佢上黎問我聽唔聽到噪音,我話聽到。佢話佢屋企24小時錄影,都錄到。但佢話要警察黎到聽到先會做野,有錄到都無用。我留左個手機號碼比佢,但佢無聯絡過我。
前排我係將軍澳主場個群組出POST講噪音,遇到有個人PM我,佢話佢之前都係住呢棟樓,又係中層。但就係因為噪音問題,而成家幾個人搬走左。我比我條片佢睇,佢話就係呢種噪音。我同佢都幾好傾,我話應該關宗教、靈異、政府事,佢話可能係痴線佬整噪音。我話都可能係,但好難唔同單位都有呢D噪音,因為成棟樓都貼哂噪音通告+單位號碼牌大部分被破壞。
事件發展大致上去到呢到,講住咁多先。
噪音片:https://www.youtube.com/watch?v=nYf9Fki16-8
行哂40層樓既靈探片(唔止一段,upload哂去我youtube):https://www.youtube.com/watch?v=GqK3ha9RE6M
重申返,關心成個脈絡或想幫助既人士,可以留言傾計,我亦都會盡量答。